“Eşitmişəm uzaqlardan...”

Səməd Vurğunun “Azərbaycan” şeiri amerikalı məktəblilərin ifasında

Azərbaycanın ABŞ-dakı səfirliyində “Embassy Adoption” proqramı çərçivəsində Vaşinqton şəhərindəki “Anne Beers” məktəbinin 5-ci sinif şagirdləri ilə görüş olub.

Əsası 1974-cü ildən qoyulmuş proqramın məqsədi orta məktəb şagirdlərinin dünya dövlətlərinin tarixi, mədəniyyəti, coğrafiyası haqqında dünya görüşünü formalaşdırmaqdır. Beş ay davam edən proqram çərçivəsində Vaşinqtonda akkreditə olunmuş səfirliklər Kolumbiya bölgəsində yerləşən məktəblərin 5-ci və 6-cı sinif şagirdlərinə təmsil etdikləri dövlətin tarixi, coğrafiyası, adət-ənənələri və mədəniyyəti barədə təqdimatlarla çıxış edirlər. Hazırda 61 səfirlik bu proqramın iştirakçısıdır.

Ölkəmizlə bağlı proqramın başa çatması ilə əlaqədar təşkil olunmuş görüşdə şagirdlər Xalq şairi Səməd Vurğunun “Azərbaycan” şeirini Azərbaycan və ingilis dillərində söyləyib, respublikamız haqqında əldə etdikləri bilikləri bölüşüblər.

Tədbirdə Azərbaycanın mədəniyyəti, milli bayramları, adət-ənənələri, mətbəxi, dili, tarixi barədə təqdimatlar edilib. Sonda şagirdlərin hazırladıqları Azərbaycan xalçalarının rəsmlərindən ibarət albom səfirliyə hədiyyə edilib.

Mədəniyyət.- 2013.- 19 iyun.- S. 13.